សេចក្តីសំរេច នៃ អគ្គទេសាភិបាល ប្រេវីយេ

ដកស្រង់ចេញពី៖ សៀវភៅ គណៈកម្មាធិការព្រំដែនកម្ពុជា 
បោះពុម្ភលើកទី២ ដោយលោក ស៊ាន ម៉ាសាវ៉ាង 
អគ្គលេខាធិការ គណៈកម្មាធិការព្រំដែនកម្ពុជា 
ទំព័រ ៣៦-៣៧ 

ក្រុងហាណូយ ថ្ងៃទី ៣១ ខែ មករា ឆ្នាំ ១៩៣៩

អគ្គទេសាភិបាលប្រទេសឥណ្ឌូចិន

Grand Officier de la Legion d'honneur

មកដល់ លោកទេសាភិបាលប្រទេស កូសាំងសុីន

ក្រុងព្រៃនគរ ។ 

កម្មវត្ថុ ៖ បណ្តាកោះនានា នៅក្នុង ឈូងសមុទ្រសៀម 

ខ្ញំុមានកិត្តិយស នឹងជម្រាបលោកថា ខ្ញុំទើបបានពិនិត្យជាថ្មីនូវបញ្ហា កោះនានានៅក្នុង ឈូងសមុទ្រសៀម ដែលមានការតវ៉ាពីសំណាក់ ប្រទេសកម្ពុជា និង ប្រទេសកូសាំងសុីន ក្នុងការទាមទារអោយបានជាម្ចាស់កោះទាំងនោះ។ 

ស្ថានភាពកោះជាចង្កោមដូច គ្រាប់ផ្គាំ ប្រឡេះដាច់រតាត់រតាយ នៅតាម ឆ្នេរសមុទ្រខ្មែរ ដែលភាគខ្លះឋិតនៅជិតឆ្នេរសមុទ្រនេះខ្លាំងណាស់ណ៎ាទៅ រហូតដល់នាំអោយនឹកគិតថា ដីដែលទឹកនាំយកមកចាក់បន្តៗ ដូចយ៉ាងសព្វថ្ងៃនេះ មុខជានឹងចាក់ជាប់មកច្រាំងខាងស្រុកខ្មែរ ក្នុងពេលអនាគតយ៉ាងខ្លី នេះបញ្ជាក់ប្រាប់ថា តាមការសមហេតុសមផល និង តាមភូមិសាស្រ្ត ផង មានការតម្រូវអោយបញ្ចូលកោះនោះ មកនៅក្រោមការត្រួតត្រា ប្រទេសហ្នឹង ។ 

ខ្ញុំយល់ឃើញថា មិនអាចទុកកាលៈទេសៈ ដែលបង្ខំបណ្តាជននៅលើកោះទាំងនោះ អោយធ្វើដំណើរកាត់សមុទ្រឆ្ងាយ ឬ វាងដែនដីខ្មែរ យ៉ាងយូរដើម្បីមកជួប រដ្ឋបាលកូសាំងសុីន តាមរបៀបហ្នឹងអង្វែងតទៅទៀតទេ ។ ដូច្នេះខ្ញុំ បានសំរេចថា កោះទាំងអស់នៅខាងជើងបន្ទាត់កាត់ ជាកែងសំយុងមួយ មករកឆ្នេរសមុទ្រដែលចេញមកពី ព្រំប្រទល់ប្រទេសខ្មែរ និង ប្រទេសកូសាំងសុីន ដោយមានមុំមួយមានកំរិត ១៤០ដឺក្រេ ជាមួយទិសជើង មេ៉រីឌ្យាង ស្របតាមផែនទីដាក់ជាប់មកនេះ អោយនៅក្រោមការត្រួតត្រារបស់ប្រទេសខ្មែរ ចាប់ពីពេលនេះតទៅ ។ ប្រទេសអាណាព្យាបាល នឹងទទួលបន្ទុកជាពិសេស ខាងផ្លូវតម្រួតកោះទាំងនោះ។

រូបភាព៖ ដកស្រង់ចេញពីអត្ថបទ យួនត្រូវ "ខ្ជាក់" កោះត្រល់យ៉ាងអាម៉ាស់

**** កោះទាំងឡាយនៅខាងត្បូងបន្ទាត់ ដោយរួមទាំង កោះភូកុក ទាំងមូលផង នឹងស្ថិតនៅក្រោមការត្រួតត្រារបស់ ប្រទេសកូសាំងសុីន ។ ត្រូវអោយមានការយល់ថា បន្ទាត់បែងចែកនេះ នឹងវាង កោះភូកុក ផ្នែកខាងជើង ចម្ងាយ ៣ គីឡូម៉ែត្រ ពីចំណុចចុងបំផុតទៅខាងជើងកោះនេះ ។

រូបភាព៖ ដកស្រង់ចេញពី កំណត់ត្រាកោះត្រង់ ដោយលោកបណ្ឌិត សាយ បូរី

អំណាចផ្សេងៗខាងផ្នែក រដ្ឋបាល និង ខាងតម្រួត នៅលើកោះទាំងនោះ ត្រូវបានបែងចែករវាង ប្រទេសកូសាំងសុីន និង ប្រទេសខ្មែរ យ៉ាងនេះ អោយបានច្បាស់លាស់ ដើម្បីជៀសវាង ការតវ៉ាទាំងឡាយតទៅអនាគត។ 

សូមយល់អោយបានច្បាស់ថា នេះគឺនិយាយតែអំពីរឿង រដ្ឋបាល និង តម្រួត ទេ ចំណែកឯបញ្ហាទាក់ទងនឹងរឿងភ្ជាប់កោះទាំងនោះ ទៅនឹងដែនដីខាងណាៗ ត្រូវទុកវាជាមួយអន្លើសិន ជាដាច់ខាត។ 

សូមលោកមេត្តា រៀបចំចាត់ការផ្សេងៗទៅ ដើម្បីប្រតិបត្តិតាមសេចក្តីសម្រេច របស់ខ្ញុំអោយបានជាបន្ទាន់ ។ 

សូមលោកបញ្ជាក់ពីការទទួលសំបុត្រនេះ ទៅខ្ញុំវិញជាលាយល័ក្ខអក្សរ ។ 

ហត្ថលេខា ៖  ប្រ៊េវីយេ